सिरहा । जनता समाजवादी पार्टी नेपालका सिरहाका नेता रामदयाल यादवले पार्टीलाई प्राइभेट कम्पनी जसरी ठानिएको भन्दै आपत्ति जनाएका छन् ।
जसपा सिरहामा विवाद छ । एक पक्षले आफ्नो पक्षका उम्मेदवारको नाम सिफारिस गरेर पठाएको छ । तर, अर्को पक्षले एकत्रित भएर उम्मेदवार चयन गर्नुपर्नेमा गुटगट हिसाबले उम्मेदवार चयन गरिएको भन्दै आपत्ति जनाएको हो ।
नेता यादवले एक पक्षीय हिसाबले गरिएको सिफारिस अवैध रहेको आरोप लगाए । उनले सिरहामा पार्टीलाई सखाप पार्न एउटा गिरोह सक्रिय रहेको भन्दै उनीहरूलाई पहिचान गरी कारवाही गर्न पार्टी नेतृत्वसँग माग पनि गरे ।
प्रतिनिधिसभा तथा प्रदेश सभाका उम्मेदवार सिफारिसका लागि क्षेत्रीय भेला बस्नुपर्ने हुन्छ । तर, भेलासमेत नबसी एकलौटी गरिएको भन्दै अर्को पक्ष असन्तुष्ट छ । जसपा सिरहामा केही व्यक्ति आफै नेता बन्न खोजेका छन् । तर, उनीहरूको जनाधार नै छैन ।
जनता तथा कार्यकर्ताको बीचबाट अनुमोदन हुन नसक्नेहरू आफू नै नेता भएको भन्दै प्रचार गरिरहेको उनको आरोप छ ।
