नविन निर्भय यादव
सप्तरी । सप्तरीको महादेवा गाउँपालिकास्थित प्रसिद्ध अंकुरी महादेवलगायतका महादेव मन्दिरहरुमा शुक्रबार अनन्त चतुर्दशीको मेला लागेको छ ।
भाद्र महिनाको शुक्ल पक्षको चतुर्दशीका दिन अनन्त चतुर्दशीको मेलामा सप्तरीको महादेव मन्दिरहरुमा पूजा गर्ने भक्तजनहरूको घुइँचो लागेको हो ।
प्रत्येक वर्ष भाद्र शुक्ल चतुर्दशीका दिन सप्तरीको महादेवा गाउँपालिकाको अंकुरी महादेव, राजविराजको हरिनन्देश्वर महादेव, शम्भुनाथ नगरपालिकाको शम्भुनाथ, कञ्चनरुप नगरपलिका बलुवाको भजनेश्वरनाथ र छिन्नमस्ता गाउँपालिकाको लालेश्वरनाथ महादेव मन्दिरमा पूजा, आराधना गर्नेको मेला लाग्ने गर्छ ।
अनन्त चतुर्दशीका दिन भगवान् अनन्तको धार्मिक विधिपूर्वक पूजा गर्दै भक्तजनहरूले सप्तकोशी नदीबाट जल भरेर २० किलोमिटर पैदल यात्रा तय गर्दै अंकुरी महादेव र २५ किलोमिटर यात्रा तय गर्दै भजनेश्वरनाथ मन्दिरमा बिधिबत तरिकाले पुजा अर्चना गरेका छन् ।
अंकुरी महादेव मन्दिरका पुजारी पबन गिरीका अनुसार अनन्त चतुर्दशीको दिन सप्तरी लगायत छिमेकी मुलुक भारतका भक्तजनहरू समेत प्रत्येक वर्ष पुजा पाठ गर्न आउने गरेका छन् । करिब २ हजार भन्दा बढी भक्तजनहरू प्रत्येक वर्षको अनन्त चतुर्दशीको दिन आउने गरेको स्थानीयवासीको भनाई छ र
सोही आवसर पारेर विभिन्न संघ–संस्थाहरूले भक्तजनहरूलाई निःशुल्क सहयोग समेत गरेका छन् । महादेव मन्दिर समितीले स्वास्थ्य शिविर, महादेवाका युवाहरूले स्वयम्सेवक, इलाका प्रहरी कार्यालय हनुमाननगर र तिलाठी कोईलाडी गाउँपालिका को वर्साइनस्थित प्रहरी कार्यालयले शान्ति सुरक्षा, फलफूल वितरण गरेका छन् ।
अगवानि घाटबाट आएका १ सय ५ काँवरियाको पैदल टोलीलाई समेत निःशुल्क सेवा र सुरक्षा दिएको स्थानीय मनिलाल राउतले बताए ।
कहिल्यै अन्त्य नहुने सृष्टिका कर्ताधर्ता र सम्हारकर्ता, निर्गुण ब्रह्मको भक्तिको दिनको रुपमा अनन्त चतुर्दशीको व्रत लिने गरिएको पुजारी गिरीले बताए । भक्तजनले लौकिक क्रियाकलापबाट मनलाई हटाएर ईश्वरभक्तिमा अनुरक्त हुने दिन भएकाले यो दिन वैदिक मन्त्रोच्चारणपूर्वक भक्तिको स्मृति गरी अनन्तको डोरो बाँधिने गरिएको उनले बताए । धन, पुत्रादिको कामनापूर्तिका लागि अनन्त चतुर्दशीको व्रत गर्ने विश्वास रहि आएको छ ।
