सप्तकोशी नगरपालिकाले ७ महिनामा २२ लाख ६० हजारकाे इन्धन खर्च गरे
कैलाश माझी सप्तरी ।
सप्तकोशी नगरपालिकाले ७ महिनामा २२ लाख ६० हजार भन्दा बढीकाे इन्धन खर्च गरेकाे छ ।
सूचनाको हकको अभियन्ता तथा पत्रकार कैलाश माझीले सप्तकोशी नगरपालिकामा आ. ब. २०७९/०८० मा सवारी साधनमा प्रयोग हुने इन्धन खर्चसम्बन्धी सूचना विवरणको प्रमाणित प्रतिलिपी पाउ भनी सूचनाको हकसम्बन्धी ऐन २०६४ बमोजिम सूचना माग गरेका थिए ।
गत चैत्र १७ गते सप्तकोशी नगरपालिकाको कार्यालयका सूचना अधिकारी शैलेश गुप्ताले सूचना मागकर्ता कैलाश माझीलाई लिखित रुपमा सूचना उपलब्ध गराएपछि यो रहस्य सार्बजनिक भएको छ
नगरपालिकाको सूचना अधिकारीले उपलब्ध गराएको सूचना अनुसार श्रावण देखि फाल्गुन महिना सम्ममा सवारी साधन इन्धन बापत २२ लाख ६० हजारभन्दा बढी रकम लेखा बाट भुक्तानी गरेको पाइएको छ । उपलब्ध सूचना अनुसार सप्तकोशी नगरपालिकामा २० वटा ठूला तथा साना सवारी सञ्चालनमा रहेका छन् । जस्मा १२ वटा मोटरसाइकल, २ स्कुटर, १ जिप, १ एम्बुलेन्स, १ ट्रिपर, १ रोलर, १ ट्रयाक्टर, १ ब्याकहो लोडर गरि जम्मा २० सवारी रहेका छ्न । ती मध्ये धेरै सवारीलाई सरकारी कामकाजका लागि भन्दै नगरपालिकाले इन्धनको कुपन उपलब्ध गराउने गरेको छ । कुपन लिएर नगरपालिका कार्यालय छेउमै रहेको बसन्ती ट्रेड सेन्टर पेट्रोल पम्पमा गएर कर्मचारीले सवारीमा इन्धन भर्ने गरेका छन् ।
सरकारी कामका लागि भनेर नगरपालिकाले इन्धनवापत खर्च छुट्याउने गरेको छ । तर, कतिपय सवारी व्यक्तिगत काममा कर्मचारीले प्रयोग गर्दै आएका छन् । भने कतिपय कर्मचारीले सरकारी विदाका दिन पनि सवारी दुरुपयोग गर्दै आएका छन् ।
