हुकिङ लगाउने क्रममा करेन्ट लागेर १५ वर्षीय छात्रको मृत्यु
पब्लिक प्रेस संवाददाता
राजविराज,जेठ ११। राजविराज नगरपालिकास्थित रहेको शिव इन्टरनेसनल बोर्डिङ स्कुलमा कक्षा १० मा अध्ययनरत एक छात्रको मृत्यु भएको छ।
जिल्लाको राजगढ गाउँपालिका वडा नम्बर १ झुटकीका १५ वर्षीय पेसलानन्द यादवले शिक्षकको आज्ञा बमोजिम बिजुली तारमा हुकिङ् लगाउने क्रममा करेन्ट लागेर मृत्यु भएको हो।
बिधालयमा प्रत्येक शुक्रबारका दिन नियमित हुने अतिरिक्त क्रियाकलापका लागि आयोजना गरिएको कार्यक्रममा स्पिकर बजाउने प्रयोजनका लागी बिजुलिको तारमा हुकिङ लगाउन पेसलानन्दलाई शिक्षकले आदेस गरिएको मृतकका बुबा लक्ष्मण प्रसाद यादवले जानकारी दिए ।
उनका अनुसार बिहान् ५ बजेको समयमा छोरा बिधालय पुगेका थिए।बिहान सात बजेको समयमा बिधालयको लापरबाहीका कारण घटना भएको उनले आरोप लगाए ।’राजविराजस्थित छिन्नमस्ता अस्पतालमा उपचारार्थ ल्याएको पेसलानन्दलाई चिकित्सकले मृत घोषणा गरे’उनले भने ।
शवलाई पोस्टमार्टमका लागी गजेन्द्रनारायण सिंह अस्पतालमा राखिएको छ।घटनाबारे अनुसन्धान भइरहेको जिल्ला प्रहरी कार्यालय सप्तरीले जनाएको छ।बुबा लक्ष्मण प्रसाद यादव र आमा प्रर्मिला देवी यादवका एउटा छोरा र एउटी छोरी रहेको छ।
